Aalkoeåålmegh leah åvtese lokngesovveme gelline daejstie nænnoesvoeteulmijste. Daennie prosjektesne gïetedibie joekoen 3. nænnoesvoeteulmiem healsoen bïjre, jïh 10. nænnoesvoeteulmiem mij lea giehpiedimmien bïjre joekehtsvoetijste laantine jïh laanti gaskem. 3. nænnoesvoeteulmie mijjem åelede hijven healsoem hoksedh jïh jieledekvaliteetem gaajhkesidie eevtjedh, saaht maam aaltaridie, tjoelide jallh etnisiteetide almetjh utnieh. Akte vihkele eaktoe jis edtja maehtedh seammavyörtegs healsoedïenesjefaalenassem vedtedh, lea hijven healsoestatistihke gaajhkide dåehkide gååvnese, aaj saemien årroejidie. Akte dejstie bielieulmijste 3. nænnoesvoeteulmesne lea aareh bïeljelimmiem, aehpievuarjasjimmiem jïh gïetedimmiem nænnoestidh nasjonaale jïh veartenevijries healsoeaehpijste. Jis edtja daam ulmiem jaksedh, dotkemeprosjekth mejtie lea sjïerelaakan hammoedamme saemien årroejidie jïh mah saemien årrojh leah hammoedamme, vihkeles viehkie. Daate prosjekte vihkeles viehkine sjædta 3. nænnoesvoeteulmiem saemide Nöörjesne jïh aalkoeåålmegidie arktiske seabradahkine jaksedh. Lissiehtamme daajrojne covid-19-prosjekten tjïrrh mijjieh aaj viehkiehtibie 10. nænnoesvoeteulmiem jaksedh, mij bielieulmine åtna joekehtsgïetedimmiem dåehkiej gaskem giehpiedidh.