Sámi dutkamiid guovddáš bovde Joho Niillas seminárii guovvamánu 13. beaivvi dii. 11.15-12.00. Boađe guldalit go Lene Antonsen ja Laura Janda muitaleaba oamastangehčosiid geavaheami birra aviisateavsttain. Váldde mielde niestti, mii guossohit gáfe ja deaja.
(Senter for samiske studier inviterer til Joho Niillas seminar onsdag 13. februar 2019 kl. 11.15-12.00. Lene Antonsen og Laura Janda skal snakke om bruken av possessive endinger på substantiv i samiske avistekster. Formålet med Joho Niillas seminarene er å skape en arena for å diskutere faglige tema på samisk. Ta med matpakke, vi serverer kaffe og te.)
Áigi: Gaskavahkku guovvamánu 13. b. 2019, dii. 11.15-12.00
Báiki: Čoahkkinlatnja Guovssu TEO-H2 2.228, Sámi dutkamiid guovddáš
Lene Antonsen ja Laura Janda doallaba ovdasága fáttás
Girjjistis dahje iežas girjjis? Earutkeahtes oamasteapmi davvisámi aviisateavsttain
Letne guorahallan man láhkai substantiivvat oktan oamastangehčosiin geavahuvvojit davvisámi aviisateavsttain.
Oamastangehčosat leat unnit geavahusas aviisateavsttain go čáppagirjjálašvuođas, ja muhtun muddui eará substantiivvaiguin go čáppagirjjálašvuođas . Letne erenoamážit geahččan substantiivvaid maidda aviisateavsttain dávjjimusat lasihuvvo oamastangeažus (omd. girji: girjjistis), ja maiddái geahččan man dávjá dát substantiivvat leat mielde gihpuin main lea refleksiivapronomen genetiivvas (iežas girjjis). Máilmmi dásis lea dábálaš juohkit oamasteami guovtti jovkui, earutkeahtes oamasteapmi (eŋg. inalienable possession) ja earuhahtti oamasteapmi (eŋg. alienable possession), mii lea buot eará go earutkeahtes oamasteapmi.
Letne guorahallan makkár juohkáseapmi lea dán guovtti joavkku gaskkas davvisámegielas.
Lene Antonsen bargá dutkin UiT Norgga árktalaš universitehta Giela ja kultuvrra instituhtas. Son lea oassin Giellateknos - Sámi giellateknologiija dutkanjoavkkus.
Laura Janda lea ruoššagiela professor UiT Norgga árktalaš universitehtas. Dasa lassin son maiddái dutká sámegielaid. Son lea jorgalan moadde girjji davvisámegielas eŋgelasgillii.
Joho Niillas seminára lea Joho Niillasa dahje Nils Jernslettena gudnin. Joho Niillas lei Romssa universitehta vuosttaš sámegiela professor. Son lei maiddái servodatberošteaddji, earret eará lei son sámediggeáirras, sámi vuoigatvuođalávdegotti áirras ja biibbaljorgalanbarggu jođiheaddji.
Semináraráiddu ulbmil lea sámegillii gaskkustit dutkamiid ja áigeguovdilis áššiid. Sihke UiT Norgga árktalaš universitehta dutkit ja earát leat buresboahtin muitalit iežaset dutkamiid birra. Váldde oktavuođa Sámi dutkamiid guovddáža fágalaš jođiheddjiin Niklas Labbain jus háliidivččet ovdanbuktit iežat dutkama muhtun Joho Niillas semináras.
Bures boahtin!
When: 13.02.19 kl 11.15–12.00
Where: Meeting room 2.228 Guovssu, Centre for Sami Studies
Location / Campus: Tromsø
Target group: Ansatte, Studenter, Besøkende
Contact: Niklas Labba
Phone: 77644566 / 91167138
E-boastta: niklas.labba@uit.no