Sámi dutkamiid guovddáš fállá oahpuid mat leat mielde gokčame dan dárbbu mii lea sámi- ja eamiálbmotguoskevaš máhtu ektui báikkálaččat ja máilmmiviidosaččat. Min guokte eŋgelasgielat masterprográmma leat máŋggafágalaččat ja sisttisdollet humanisttalaš ja servodatdieđalaš fáttáid. Master in Indigenous Studies (MIS) fállojuvvo ollesáiggeoahppun Romssa campusas. Master in Governance and Entrepreneurship in Northern and Indigenous Areas (GENI) lea vejolaš váldit sihke olles- ja oasseáiggeoahppun, ja buot oahpahusat, bagadusat, ja eksámenat čađahuvvojit digitálalaččat. Dát masterprográmma lea ovttasbargu University of Saskatchewan nammasaš universitehtain Kanádas.

Min kandidáhtat leat bivnnuhat bargomárkanis, ja sii fidnejit bargguid máŋggain iešguđetlágan surggiin, ležžet dal mediain ja organisašuvnnain, hálddašan- ja jođihansuorggis, ja viidáset dutkamiin. Dasa lassin sáhtát Sámi dutkamiid guovddáža mastergrádain fidnet riikkaidgaskasaš fierpmádaga mii dutnje šaddá illun maiddái boahtteáiggis.